KRALENDIJK- Komishon Supervishon Protekshon di Datonan Personal BES (CBP BES) tin intenshon di imponé un òrdu someté na kastigu di pago (last onder dwangsom) riba Entidat Públiko Boneiru (EPB). A tuma e paso akí pa motibu ku EPB no a sigui e konsehonan di CBP BES i no a kumpli ku akuerdonan anterior.

Na mart 2023 CBP BES a hasi un kontrol na EPB. For di esaki a resultá ku no a implementá sufisientemente e maneho di ‘clean desk’ i ‘clear screen’, parti di e maneho ‘Na kaminda pa bira konsiente di siguridat di informashon’. Pa e motibu ei no a protehá datonan personal adekuadamente.

Segun CBP-BES ta bisa, apesar di e rapòrt i ‘deadline’ stipulá di òktober 2023 i promé di mart 2024, EPB a keda sin tuma e medidanan nesesario, aloménos a keda sin informá CBP BES adekuadamente al respekto. Ademas EPB no a duna un reakshon supstansial riba preguntanan di CBP BES, ku mester a kontestá promé ku 22 di aprel 2024.

A base di loke tin ariba menshoná e Komishon ta konkluí ku EPB no a implementá e maneho ‘Na kaminda pa bira konsiente di siguridat di informashon’ debidamente ku komo konsekuensia ku EPB (ainda) no ta kumpli ku protekshon adekuado di dato personal organisatorio i tékniko na diferente lugá di trabou. E komishon a inkluí rekomendashonnan ku mester haña prioridat i pasonan ku mester tuma den e rapòrt. Te ku awe no a sigui e rekomendashonnan akí.

Un òrdu someté na kastigu di pago ta un instrumento di mantenshon di korekshon ku CBP BES tin na su disposishon. Ta trata di un òrdu someté na kastigu di pago ku ta suma $15.000 si keda sin implementá medidanan na tempu, ku por oumentá te na un máksimo di $90.000,- relashoná ku tempu ku transkurí. 

Apropiá 

Ta konsiderá e medida akí apropiá pa laga EPB move i ainda ehekutá e rekomendashonnan preskribí i prevení ku ta sigui violá legislashon di privasidat.

E rapòrt i mas informashon ta na disposishon riba wèpsait di CBP BES: www.cbpbes.com.