WILLEMSTAD – Centrum Supermarket mester paga un señora di 66 aña, ku a kai den e supermekado i kibra su heup, un daño i perhuisio. Ta trata di alrededor 21.000 florin. 

E insidente a sosodé den luna di novèmber di aña 2018. E señora a kai riba algun tabla ku tabata pon’é na un sitio den e supermerkado kaminda trabounan di renobashon tabata tumando lugá.

E flur no tabata akabá i tabatin tablanan di triplèks poné pa klientenan pasa riba nan pa por yega na e rèkinan ku produkto. Pero e tablanan no tabata bon pegá na e flur, ku konsekuensia ku esaki a pone ku e tabla a skuif bou di pia di e señora, ku konsekuensia ku el a kai i kibra su heup.

E señora a eksigí un daño i perhuisio di e supermerkado pa daño material na balor di kasi 35.000 florin i pa daño inmaterial na rason di 50.000 florin. E señora a reklamá e daño pasobra Centrum Supermarket no a tuma sufisiente medida di siguridat pa avisá klientenan ku e sitio ta peligroso i ku nan mester kana ku kuidou.

Laga di deseá 

Segun e wes e medidanan pa avisá e klientenan ku tin trabounan di renobashon ta tumando lugá den e supermerkado a laga hopi di deseá. Un bòrchi pafó pa spièrta ku paden trabounan di renobashon ta tumando lugá i un bòrchi di atvertensia pa slepmentu na e sitio no ta sufisiente.

No tabatin nada ku ta spièrta ku bo por trompeká riba e tablanan i pa bai ku kuidou. Tambe den henter e supermerkado kaminda e frizernan ta tabatin bòrchinan di atvertensia pa slepmentu pa motibu di awa. Segun un rapòrt di investigashon mester a sera henter e área aki di manera ku e personanan lo no por a bai hasi kompra einan.

E señora a bisa durante tratamentu di e kaso ku e no tabata den posishon pa por a limpia dos apartamentu ku e ta manehá, ku konsekuensia ku no por a hür nan. Tambe tabatin retraso durante konstrukshon di algun studio, pasobra su situashon no a pèrmiti’é pa supervisá e konstrukshon.

Wes a konsedé e señora kasi djesun mil florin di daño i perhuisio pa daño material i djes mil florin pa daño inmaterial. Ademas e supermerkado mester paga kasi djes mil florin na gastunan di abogado.