KRALENDIJK – Despues di añanan ku tabatin un saldo positivo riba presupuesto, Boneiru tin e aña aki un défisit. Segun e Kolegio di Supervishon finansiero, Cft, Boneiru mester duna prioridat na un presupuesto balansá di mas aña i traha un presupuesto kaminda ta reflehá tantu e ambishonnan di Boneiru komo e kapasidat di ehekushon di e entidat públiko.

E défisit riba presupuesto di Boneiru na 2023 ta 900.000 dòler. Mirando e entradanan èkstra di impuesto di turista, e oumento struktural di e kompensashon liber i e rekuperashon ekonómiko despues di e krísis di corona no mester tin défisit riba presupuesto segun Cft.

Cft ta mustra riba e ‘realisatiecijfers’ preliminar, ku ta mustra un saldo positivo riba presupuesto di 2022 i ta pidi atenshon pa un presupuesto realista, teniendo kuenta ku e kapasidat di ehekushon di Boneiru.

Maneho finansiero

Último aña Boneiru a pone pasonan importante pa mehorá e maneho finansiero. Na fin di 2022 a definí e maneho di tereno i tambe e definishon di e maneho di eliminashon di debe, segun Cft.

Tambe Boneiru a proponé un plan di akshon renobá pa mehorá e atministrashon finansiero. Pero a kambia e fecha límite pa un deklarashon di kontabilidat no kalifiká huntu ku e relato anual den e plan aki di 2022 pa 2023. Cft ta lamentá esaki.

Cft a pidi atenshon tambe pa suministro di informashon ku ta sali di kolegio ehekutivo pa konseho insular i Cft. E informashon den e raportahenan di aplikashon den 2022 tabata vários biaha muchu limitá pa haña sufisiente bista di e posishon finansiero di Boneiru.

Banda di esei no tabata kumpli den tur kaso ku e prosedura pa adaptá e presupuesto manera ta preskribí den e Lei di finansas pa e entidatnan públiko Boneiru, Sint Eustatius i Saba. Esaki ta limitá e revishon den e posishon di e presupuesto i ta limitá Cft den su evaluashon di kumplimentu ku e presupuesto.

Bonaire International Airport (BIA)

E aeropuerto tin un posishon importante den e ekonomia Boneriano. Durante un kòmbersashon ku gerente di BIA Cft a tuma nota di e Masterplan 2040, ku ta dirigí riba kumplimentu ku e normanan di seguridat internashonal i preparashon di e aeropuerto pa futuro.

Den kolaborashon ku e ministerio di Infrastruktura i Obranan Públiko i entidat públiko Boneiru, e aeropuerto ta invertí den modernisá e plataformanan i den ampliashon i modernisashon di e terminal.

Lidewijde Ongering tabata pa promé biaha na Boneiru den su kalidat di presidente di Kolegio di supervishon finansiero di Kòrsou i Sint Maarten, e Kolegio di supervishon finansiero di Aruba i e Kolegio di supervishon finansiero di Boneiru, Sint Eustatius i Saba.