KRALENDIJK – Den su kòmbersashon ku Kolegio Ehekutivo di Boneiru, Kolegio di supervishon finansiero di Boneiru, Sint Eustatius i Saba (Cft) a pidi atenshon pa trahamentu di un presupuesto balansá i realístiko. 

Boneiru ta presupuestá un défisit presupuestario den 2023, despues ku pa hopi aña largu el a realisá surplus presupuestario. Ta di importansia pa Boneiru duna prioridat na un presupuesto di mas aña ku ta balansá i prepará un presupuesto ku ta demonstrá tantu e ambishonnan di Boneiru, komo e forsa di ehekushon di e entidat públiko.

Riba 15 di novèmber 2022, Konseho Insular di Boneiru a aprobá e presupuesto di 2023, despues di kua Sekretario di Estado di Asuntonan Interno i Relashonnan den Reino a aprobá esaki. Boneiru ta presentá den 2023 un défisit presupuestario di USD 0,9 mion. Den kòmbersashon ku Kolegio Ehekutivo di Boneiru,  Cft a enfatisá e importansia di un presupuesto balansá i realístiko. Komo konsekuensia di e entrada èktra di impuesto di turista, oumento struktural di kontribushon liber (vrije uitkering) i rekuperashon ekonómiko despues di e krísis di korona, Cft no ta mira nesesidat pa un défisit presupuestario. Cft a pidi atenshon tambe pa e sifranan di realisashon preliminar di 2022, kualnan ta mustra un surplus presupuestario pa 2022, i den e kuadro ei Cft a pidi atenshon pa un presupuesto realístiko, teniendo kuenta ku e forsa di ehekushon ku Boneiru tin.

Maneho finansiero

Boneiru a tuma algun paso importante aña pasá pa mehorá su maneho finansiero. Asina, por ehèmpel, na fin di 2022 a aprobá maneho di tereno. Meskos aprobamentu di maneho di eksonerashon tambe ta un paso den e bon direkshon. Ademas Boneiru a traha un plan di akshon renobá pa mehorá maneho finansiero. Sinembargo, den e plan ei a hala e deadline pa un deklarashon aprobatorio di akoùntent di e kuenta anual di 2022 pa 2023. Cft a pone énfasis riba importansia di bon maneho finansiero i a enkurashá Boneiru pa sigui pone ophetivo ambisioso pa su mes.

Cft a pidi atenshon tambe pa suministro di informashon di parti di Kolegio Ehekutivo pa Konseho Insular i pa Cft. Na vários okashon den 2022 informashon den e reportahenan di ehekushon tabata demasiado limitá pa por a duna un bista sufisiente di e posishon finansiero di Boneiru. Banda di esei, no ta den tur kaso a kumpli ku e prosedura pa adaptá presupuesto, manera esaki ta preskribí den e Lei di finansa pa e entidatnan públiko Boneiru, Sint Eustatius i Saba. Esaki ta limitá e bista di e estado di e presupuesto i ta limitá Cft den su evaluashon di ehekushon di e presupuesto.