KRALENDIJK- Dia 27 di novèmber Fundashon Akademia Papiamentu lo tin un charla tokante idioma papiamentu den sala di Corallium Resort (ántes Marriot Hotel). Título di e charla ta: Papiamentu – idioma di resistensia –  bibu awe, apesar di tantu intento pa elimin’é.

Sedney Marten lo ta e orador i e lo konta tokante e orígen di nos idioma i kon el a desaroyá durante tempu. Kon e idioma a forma, esta kua otro idiomanan a yuda den e formashon ei.

Sedney lo splika tur e trastornonan ku, durante tempu, papiadónan di papiamentu a pasa ‘den pa por a komuniká den nan idioma materno.

Papiamentu a perseverá i awe e ta rekonosé bou di e tratado internashonal, Karta oropeo pa idiomanan regional i idiomanan di minoria. E charla ta kuminsá 7 or’ di anochi. Ora e kaba mitar di nuebe lo tin un bríndis, algun snèk i oportunidat pa kombersá i interkambiá di pensamentu i opinion riba e tema. 

Registrashon

E charla lo ta na papiamentu i e ta grátis. Pa registrá por manda un watsap na 786 1110 òf meil [email protected]