WILLEMSTAD – Kòrsou i Boneiru tabata aña pasá e destinashonnan mas popular for di Amsterdam Schiphol. Esei CHATA, ku ta e organisashon di interes di e sektor hospitalario na Kòrsou, ta bisa. E kantidat di pasashero pa e isla a subi ku 19 porshento i e kantidat di pasahero pa Boneiru a subi ku 59 porshento kompará ku 2019.

Schiphol, Amsterdam tabatin na 2022 52,5 mion movishon di pasahero, lokual ta nifiká un pasahero ku ta yega, ku ta sali òf ku ta di tránsito. 

For di datonan di Schiphol por mira tambe ku tabatin un oumento di 106 porshento den movishon di pasahero kompará ku 2021 ora ku outoridatnan di aviashon a registrá 25,5 mion pasahero. Esei ta  27 porshento ménos ku na 2019, ora ku 71,7 mion pasahero a biaha via Schiphol. 

Aña pasá a registrá na Schiphol 397.646 movishon di aviashon, un oumento di 49 porshento kompará ku 2021, ora ku a registrá 266.969 movishon, pero un bahada di 20 porshento kompará ku 2019 ora tabatin 496.826 movishon di aviashon.

Schiphol a konektá Hulanda direktamente ku 313 destinashon, di kua 129 ta interkontinental. Tabatin 27 destinashon nobo, mientras ku den 2022 a eliminá djes destinashon ku tabata bula den 2021 .