WILLEMSTAD –  Siman pasá Fundashon Museo di Mucha Kòrsou a selebrá su di sinku aña. A selebrá esaki henter siman ku tur sorto di aktividat dibertido dentro di e museo. Na okashon di e siman di fiesta aki a presentá un CD nòps nòps ku kantikanan di mucha tradishonal na Papiamentu. Jean-Jacques Rojer a produsí e CD i Henry van der Kwast di Maduro Holding a publik’é.

Sinku aña pasá e Museo di Mucha di Kòrsou a habri su portanan pa públiko. For di e tempu ei e museo a risibí kasi 100.000 bishitante. Esakinan ta tantu muchanan local i mayornan komo turistanan, pero tambe skolnan i bishitantenan ku a drenta gratis.

A organisá mas ku 500 fiesta di hasimentu di aña i a desaroyá hopi programa edukativo pa e grupo meta, muchanan di 1 te ku 10 aña.

“Apesar di e pandemia di Covid ku a presenta dos aña i mei despues di e apertura, e Museo di Mucha tabatin un kresementu enorme. E Museo di Mucha a bira manera nan mes ta bisa mas ku un museo riba su mes”.

Danki na e tim kreativo i apesar di e tempunan finansiero desafiante a desaroyá programanan nobo manera e proyekto Museum on the Go, ku nan ta presentá te ainda pa tur hende ku pa kualke motibu no por bishitá e Museo di Mucha.

A graba e CD Ban Pas’un Ròndu ku mas ku 30 músiko di rònt mundu. Seis mucha a kanta kantikanan tradishonal di Kòrsou manera Karpinté ta mas ku rei i Ta kon nos ta balia, pero den un bachi musikal kompletamente nobo.

“Un proyekto sumamente bunita ku nos por ta hopi orguyoso di dje komo Kòrsou”, segun Rohani de Pont. Ta duna  e sèn ku genera di e CDnan ku a bende na e Museo di Mucha pa asina por krea mas proyekto pa mucha.