KRALENDIJK- Konsehal Clark Abraham (PDB) tin diferente pregunta pa Kolegio Ehekutivo. E lider di oposishon ta spera di por tende un kontesta riba e preguntanan aki, durante un reunion públiko di Kolegio Ekekutivo riba djwapwes. 

Un promé pregunta di Abraham tin di haber ku e situashon di tráfiko na Kaya Neerlandia. Durante rehabilitashon di e kaminda a trese tambe diferente kambio na e struktura. Mientrastantu por a nota ku a lanta un debate bou di habitantenan di e kaya aki. Abraham lo ke tende kontestanan di diputado James Kroon riba e aspekto aki. 

Pa e diputado di turismo, Hennyson Thielman, Abraham tin dos pregunta. Un di esakinan ta regardá notisianan di prensa hulandes ku gobièrnu di Boneiru lo ke limitá e kantidat di turista di estadía na un total di 250.000 pa aña. “Pero realmente mi no ta komprondé dikon ta papia di limitashon, ora tuma nota ku e kantidat aki ta kasi dòbel di e kantidat di turista di estadía ku ta biniendo Boneiru aktualmente”, asina Abraham a nota. 

Tambe Abraham lo ke tende un splikashon di parti di gobièrnu di Boneiru, pa loke ta trata akseso liber pa habitantenan na tur playa na e isla. “Resientemente a skucha diferente sonido i keho di habitantenan ku no a haña akseso na playanan di diferente hotèl na e isla”. Abraham ke tende di Thielman kiko eksaktamente e maneho ta pa ku esaki. 

Kinderbijslag

Di diputado di asuntonan sosial, Nina den Heyer, Abraham ke tende kon a para ku e situashon di aporte financiero pa mucho. Aunke ku resientemente por a skucha ku mayornan di mucha ku tin nesesesidat spesial, lo por a konta riba un aporte dòbel pa yu kompará ku normal, awor ta skucha ku kisas mester bai warda te despues di fakansi grandi pa esaki keda realisá.