Boneiru – Durante Luna Mundial di Alzheimer Fundashon Alzheimer a haña djabièrnè bishita di Fundashon CliniClowns di Kòrsou. Direktor Jet Thoonen i e payasonan Bòbò (Bjorn) i Ola (Jolanda) a bini pa presentá nan método spesial pa kuido di demensia.

E delegashon a bishitá diferente instituto di kuido, entre otro Kas Karkó, Villa Antonia i Cocari Rincon, pa mustra kon nan terapia di payaso ta funshoná. Djasabra nan a duna presentashon tambe na Kas di Kuido i Ka’i Mimina. Na Kòrsou e payasonan ta duna presentashon den kuido pa grandinan, kuido pa personanan ku desabilidat mental, kuido di demensia i departamentu di mucha na  hospital. Nan ta deliberando pa añadi tambe e hòspisnan.

Djabièrnè anochi a tene un seshon informativo na Captain Don’s Habitat. Thoonen a splika kon e CliniClownsnan ta kontribuí na bienestar di personanan ku demensia, akompañá pa video i pòtrèt. E anochi tabata un éksito rotundo, ku hopi entusiasmo i interakshon di esnan presente.

Durante un lùnch riba djasabra e direktiva di Fundashon Alzheimer a diskutí e posibilidat pa lanta CliniClowns na Boneiru. Thoonen a primintí pa duna apoyo total pa e aserkamentu nobo aki den kuido di demensia riba e isla.