WILLEMSTAD – Curaçao Medical Center (CMC) mester skrap operashonnan pa motibu di skarsedat di personal. Di e seis salanan di operashon por uza kuater sala so. Esaki pa motibu di ousensia di nuebe kolaboradó importante ku aktualmente ta malu pa término largu òf ku a tuma retiru.

E hòspital a tuma medida awor pa enfrentá e problema aki. CMC ta purba di atraé peronal pa kamber di operashon for di eksterior pa yena e burakunan den e timnan di operashon mas lihé ku ta posibel. E intenshon ta pa atraé profeshonalnan ku por integrá fásil den e timnan médiko eksistente i pa por garantisá kontinuidat di kuido.  

Pero CMC no ta wak eksterior so. E hòspital ta rekonosé e importansia di invertí den komunidat di kuido lokal i tin plan pa huntu ku e skol di enfermeria IFE desaroyá i implementá programanan di entrenamentu lokal pa asisitentenan di kamber di operashon na Kòrsou.

E programanan aki lo ofresé empleadonan aspirante e kapasidatnan i konosementu nesesario pa por traha na un manera efektivo den salanan di operashon, di moda ku e reserva di kandidatonan lokal ta bira mas grandi i ta redusí e dependensia di fuentenan strañero.