WILLEMSTAD – Corendon a habri su promé agensia di biahe na Kòrsou. Situá den e bario históriko Skalo banda di hotèl The Ritz Village, e ofisina ta un sitio perfekto pa habitante- i bishitantenan pa plania i buk nan buelo, pakete di biahe i estadia na hotèl mas fásil.

E stap aki ta sigui, segun nan mes ta bisa, despues di e éksito di e buelonan regular ku Corendon ta ofresé for di novèmber aña pasá entre Amsterdam i Kòrsou.

Ta planiá pa habri e ofisina di biahe, ku ta operashonal kaba,  ofisialmente dia 9 di aprel. Bishitantenan por akudí einan pa un variedat ámplio di servisio, manera buk buelo, regla paketenan di biahe pa Europa, Turkia i Áfrika i pa buk pasnan di dia pa Corendon Mangrove Resort i e Aquapark ku ta pertenesé na dje. Tambe e ofisina ta brinda e oportunidat pa reservá akomodashon na e tres hotèlnan di Corendon na Amsterdam.

Atilay Uslu, ko-fundadó di Corendon, ta enfatisá e importansia di Kòrsou pa e empresa: “Kòrsou ta nos perla den Karibe. Ku apertura di e ofisina di biahe aki na Willemstad nos ta fasilitá e nesesidatnan di biahe di habitante- i turistanan, tantu pa bai Hulanda komo pa otro destinashonnan di Corendon.”

E buelonan regular di Corendon ta ofresé sinku biaha pa siman un konekshon komfortabel i pagabel entre Schiphol i aeropuerto di Hato, ku nan ta realisá ku un Airbus A350 super moderno. E servisio aki ta fortifiká e aksesibilidat i opshonnan di biahe pa tantu biaheronan di Hulanda komo di Kòrsou.