WILLEMSTAD – Ayera a habri Hotèl The Rif at Mangrove Beach. Sentenares di wéspet a asisití na e apertura i esaki a marka e finalisashon di e promé dos pisonan i tur otro fasilidat korespondiente di e hotèl ku na tur 385 kamber.

E hotèl luhoso The Rif at Mangrove Beach, un atkisishon nobo na e portfolio di hotèl di Corendon na Kòrsou, ta ubiká den un área úniko di awa i parke, rondoná pa mondinan di palu di mangel. Segun konosedónan e hotèl, ku Willemstad na poko distansha i un playa privá su dilanti, inkluso un réplika di e brùg di ponton i un ref di koral presioso, ta posishoná ideal pa turistanan.

E hotèl ta ofresé diferente sorto di akomodashon, di kambernan luhoso ku bista riba hardin te kambernan ‘swim-up’ ku ta duna akseso dirèkt pa pul. Wéspetnan por gosa di un estadia ‘Ultra All Inclusive’ ku diferente bar, entre kua un bar na pul i Coffeeshop, i tres restorant a la carte, ku ta ofresé un selekshon ámplio na eksperensianan kulinario di speshalidatnan Meksikano te Turko.

Den su spich di apertura Atilay Uslu, fundadó di Corendon, a enfatisá su orguyo pa e hotèl nobo i e kontribushon signifikante ku Corendon ta brinda na e komunidat lokal i ekonomia di Kòrsou.

The Rif at Mangrove Beach ta ofresé kambernan speshal pa famia i entrada na un parke di awa den Corendon Mangrove Beach Resort djis serka ei, kompletamente ku pul i gleiban, entre otro King Cobra – e úniko den su tipo den área di Karibe.

E ekspanshon di The Rif at Mangrove Beach ta parti di e invershonnan di Corendon na Kòrsou den e último sinku añanan, ku e meta pa stimulá turismo i oportunidat pa trabou riba e isla. Corendon ta enfatisá e importansha di un subida di kapasidat di trinta porshento riba e ruta Kòrsou-Amsterdam pa sostené e kresementu turístiko i ekonómiko.