WILLEMSTAD – For di yanüari kasi 445 mil bishitante ku ta keda mas ku un dia a bishitá Kòrsou e aña aki. Falta ainda luna di dezèmber. Esei Curaçao Tourist Board ta informá. Ta premirá un rèkert na fin di e luna aki.

CTB a registrá den e mésun periodo na 2019 mas ku 410 mil turista, ku a keda mas ku un dia. Pues un kresementu di seis porshento.

Novèmber

CTB ta notifiká 44 mil yegada di bishitantenan ku ta keda mas ku un dia na luna di novèmber. Ku e yegadanan aki novèmber 2022 a alkansá  115% di e yegadanan promé ku e pandemia na novèmber 2019 ora ku 38 mil bishitante  ku ta keda drumi a bishitá Kòrsou.

Novèmber 2022 te ku awor ta e luna ku a presta mihó. Otro lunanan ku tambe a presta mihó te ku awor ta yüli i òktober, ora ku respektivamente 48 i 45 mil turista ku ta keda drumi a yega. 

Kòrsou ta keda presta bon riba diferente merkado: Hulanda (43 porshento), Estados Unido di Merka (21 porshento), Colombia (seis porshento) i Canada (sinku porshento). E kuater paisnan ta bon pa 75 porshento di tur turista ku ta keda drumi ku a biaha pa Kòrsou na novèmber 2022.

Akomodashonnan 

Na tur sesenta porshento di tur bishitante ku a biaha pa Kòrsou a skohe un risòrt komo tipo di akomodashon i kuarenta porshento a keda den akomodashonnan alternativo.

Trintinuebe porshento di tur bishitante ku a biaha pa Kòrsou na novèmber ta entre 25 i 44 aña. Bishitantenan entre 45 i 64 aña ta representá 32 porshento di tur turista ku a biaha pa Kòrsou. CTB a registrá na novèmber un estadia promedio di kasi nuebe anochi.

Tabatin 41 barku krusero i kasi 86 mil bishitante krusero den luna di novèmber na Kòrsou.