WILLEMSTAD – Curaçao International Airport a rekuperá kompletamente di e konsekuensianan negativo di e pandemia di COVID i ta raportá mihó sifra di kantidat di pasahero kompará ku na 2019. 

E rekuperashon ta 101 porshento kompará ku 2019, e aña di referensia pa alkansá sifranan pre-pandémiko.

Hato a konta kasi un mion i mei pasahero ku a yega i ku a bai. Kasi 590.000 pasahero internashonal a sali for di e aeropuerto, lokual ta un kresementu di seis porshento. Kasi 700.000 pasahero a yega Hato, lokual ta un subida di kuater porshento.

E bahada tabata sintá den e tráfiko di pasahero pa Aruba i Boneiru, ku tabata falta binti porshento pa alkansá e mésun nivel ku 2019.

Di kuater kuartal 

For di yüli 2022 ora ku a reanudá tráfiko di persona komersial e operadó di aeropuerto CAP a midi e kresementu, komparando  resultadonan di kuartal.

Durante e di kuater kuartal di 2022 tabatin mas ku 150 mil pasahero internashonal ku a bai, un bahada di dos porshento kompará ku e di tres kuartal.

Na 2022 e parti di merkado Europeo na Hato tabata 49 porshento, un bahada di nuebe porshento kompará ku 2021. Norteamerika, spesialmente Estados Unido, tabatin un parti di djesocho porshento, kuater porshento mas ku den 2021. Karibe Hulandes tabatin un parti di djesseis porshento i Suramerika djesdos porshento, un subida di sinku porshento, kompará ku 2021.

Sosionan den aviashon

E averahe total di uso di kapasidat, e porsentahe di stulnan ku ta okupá pa buelo na 2022 tabata 81 porshento, un subida di un porshento kompará ku e averahe di uso di kapasidat na 2019.

Segun datonan tabatin na tur mas ku binti mil buelo regular ku tabata yega i sali for di Kòrsou, i un kapasidat total di mas ku 1,8 mion stul.

Rekuperashon di buelonan i kapasidat di stul kompará ku 2019 tabata respektivamente 92 i 99 porshento.