KRALENDIJK- Frakshon Coffie ta pará 100% tras di e petishon pa laga nos alumnonan di MBO ku ta studia komo kòki komo estudio final pasa na eksámen den idioma papiamentu. 

Esaki, segun e frakshon bou di ningun sirkunstansia ta nifiká ku nan lo no tin ku haña lès den otro idiomanan, manera Hulandes, ingles i/o spañó manera sigur e miembronan di Tweede Kamer pa PVV i VVD ke laga aparentá. 

Segun CoffieE prinsipio ta i mester keda ku e balor di un diploma no ta determiná pa e idioma den kua e studiante ta pasa su eksámen final, pero esaki ta dependé di e kalidat di e nivel, kontenido i kriterionan ku e studiante mester kumpli kuné pa duna e diploma e balor. 

“Pues si eksámen pa kòki ta eksigí sierto nivel de konosementu i abilidat, e idioma den kua e ta pasa esaki, sea ta chines, Hulandes, Ingles òf Papiamentu no ta determiná ku e studiante a kumpli ku e kriterionan aki. I si kualke studiante ke sigui pa un estudio mas avansá, esaki lo dependé di su esfuerso, su talento- i abilidatnan ku e ke i por sigui. I si den esaki e mester mehorá su konosementu i su dominio den un otro idioma , que asi sea” asina Coffie a trese dilantie. 

Tweede Kamer

Frakshon Coffie ta bisa di ta ta spera sinseramente ku e gran mayoria di Tweede Kamer lo honra e petishon pa asina krea mas oportunidat di trabou pa nos mes hendenan den e ramo di industria ku nos a skohe komo un di e pilarnan mas importante di nos ekonomia, esta turismo i den esei spesífikamente e fishi di kòki. 

Pa e frakshon mas chikitu den Koseho Insular, esaki ta e oportunidat di oro pa Tweede Kamer “put their money where there mouth is”: trato ekivalente i respetá ku den nos estudio tampoko por deskriminá pa e motibu ku mi idioma materno no ta Hulandes. 

“Aki tambe mester apliká na promé lugá artíkulo 1 di nos konstitushon ku ta respetá i rekonosé e igualdat pa lei di nos tur i a base di nos sirkunstansia apliká artíkulo 132a  – ku ta e artíkulo ku ta diferensia –  na bentaha di nos studiantenan”, asina Coffie a konkluí.