KRALENDIJK- Miembro di konseho insular, Daisy Coffie, ke sa dikon no a hasi nada ku rekomendashonnan di e asina yamá Komishon Hartman, pa yega na un subsidio pa preisnan di ticket pa biaha entre e islanan. 

“Tur hende sa ku ticket pa biaha bai Kòrsou ta hopi karu. Pa e ticket so tin ku paga un 180 dòler. Den temporada di Covid ku tur su rekesitonan, esaki a bira pió”. Segun Coffie, un biaha pa Kòrsou por sali fasilmente den kareda di 300 dòler awor. 

“Loke mi ke sa ta dikon no a hasi nada ku e rekomendashonnan di e komishon aki? Dikon tur kos a keda ketu i nunka mas nos a tende algu, di kiko ta bai hasi”, asina Coffie a trese padilanti.