KRALENDIJK – Relashoná ku e selebrashon di e evento ‘Pride’ na Boneiru, lider di frakshon di M21, Daisy Coffie, a duna su punto di vista tokante e selebrashon aki i e relashon ku derechinan humano. 

“E siman aki ta organisá pa promé bes na Bonaire e evento ‘Pride’. Mi lo ke hasi uso di e oportunidat aki pa aportá na nos komunidat ku un pida enseñansa enkuanto Derechinan Humano”, asina Coffie a skibi den un reato pa prensa. 

Segun Coffie ta splika, derechinan Humano ta e base pa dignidat i igualdat di kada individuo. Ta derechinan universal konsagrá den tratado- i normanan internashonal, garantisá pa gobièrnu na tur siudadano, independiente rasa, sekso, religion, opinion polítiko, orientashon seksual o otro faktornan.

“E derechonan humano ta protehá libertat fundamental nesesario pa un bida pleno, manera derechi di libertat di ekspreshon, asosashon i religion, derechi di enseñansa i trabou, i e derechi di bida i su debido proseso”, asina Coffie a sigui bisa. 

Coffie ta splika tambe ku ora un òf mas hende ta sinti nan diskriminá o oprimí, nan por ekspresá nan mes o resistí, loke lo generá disturbio i konflikto polítiko. P’esei rèspèt pa i protekshon di e derechinan humano ta krusial pa promové hustisia sosial i stabilidat polítiko.

“Ademas, e protekshon di derechinan humano ta hunga un papel importante tambe den e desaroyo di un sosiedat. Si personanan por ehersé nan derechi, e ta motivá nan pa partisipá plenamente i kontribuí na e sosiedat. Esaki ta permití personanan krese ekonómikamente i sosialmente, i e sosiedat den su totalidat por alkansá mas prosperi-dat.

Protehá

Segun Cofffie ta mustra ta importante pa gobièrnunan traha aktivamente pa kuida i protehá e derechinan humano. “Esaki por hasi esaki pa medio di leglislashon, polítika i programanan dirigí na implementashon i protekshon di e derechinan humano. Tin ku krea konsientisashon i ofresé enseñansa; hasiendo esaki nos por kontribuí na un sosiedat den kua nos ta respetá i garantisá e derechinan humano”.

Coffie ta sigui mustra k tur hende tin derechi. E derechinan aki ta destiná pa protehá nos di hendenan ku ke hasi nos daño, pero tambe pa yuda nos traha huntu i biba na pas. Total tin 30 derechi deskribí den e Deklarashon Universal di Derechinan Humano, un dokumento firmá pa Nashonnan Uní na 1948. Nashonnan Uní ta fundá na 1945, hustu despues di fin di Segundo Guera Mundial, ku e ophetivo pa logra i mantené pas na mundu. Awe, kasi 200 pais ta miembro di Nashonnan Uni.

Resistensia

Ounke tin basta sosten pa e selebrashon di ‘Pride’ na Boneiru, por nota tambe resistensia di sierto gremionan ku no ta mashá kontentu ku selebrashon di e evento aki. Opositor di e selebrashon ta kere, entre otro, ku ta propogandando entre otro un bida homoseksual. Esaki, segun ta tende, ta bai kontra di reglanan religioso.