KRALENDIJK- Miembro di Konseho Insular Daisy Coffie ta bisa ku e ta orguyoso di Sion Janga su logro kaminda el a habri kaminda pa hóbennan Boneriano bira miembro di e delegashon Hulandes ku ta bishita konferensia nan na nivel haltu manera esun anual di kambio di klima.

“Hóbennan manera Sion Janga, Jonathan Cranston, Julia Martinus i Maria Roldan ta hóbennan ku kurashi; hóbennan ku ke trese un kambio pa nan isla i esaki sigur ta algu ku mi ta apoyá” asina Coffi a bisa. 

Coffie ta bisa ku e ta di opinion ku kambio di klima meresé mas atenshon na Boneiru, spesialmente si e mira e rapòrt di Greenpeace kaminda ta mustra ku si nos no tuma akshon, nos isla lo disparsé bou di awa. “Mi  ta di opinion ku nos mester krea mas espasio pa nos hóbennan kompartí nan pensamentu nan, idea nan i solushonnan ku nos komo gobernante. No solamente riba área di kambio di klima pero riba tur área ku ta konserní nan”.

Traha duru

Coffie a trese dilanti ku e tópiko di kambio di clima ta algu ku e lo ke traha duru riba dje, mirando ku e Gobièrnu aktual nunka no a krea un relashon ku hóbennan Boneriano espesial esnan den eksterior pa skucha nan preokupashonnan pero tambe idea nan ku nan tin pa ku Boneiru. “M21 ke krea un plataforma kaminda hóbennan por ta den kontakto ku Gobièrnu strukturalmente pa trese input riba diferente tema”.