WILLEMSTAD – Despues di djesdos aña di servisio Darick Jonis a disidí di baha komo direktor di Aqualectra. El a tuma su desishon despues ku pa di dos biaha e luna aki Kòrsou a sufri un black out total.

Darick Jonis a bisa ku “ta basta”. El a hasi tur su esfuerso e último djesdos añanan pa pèrkurá ku komunidat por konta riba un bon servisio di Aqualectra, pero awor e ta tene honor na su mes.

Kousa

Durante ámbos biaha ku koriente a kai afó a pasa pa e sistema di schakel pa rekuperá koriente gradualmente pa henter e isla. E promé fayo di koriente tabata konsekuensia di daño na e kabel prinsipal durante di trabounan di un kontratista riba kaya.

E di dos fayo di koriente di e siman aki tabata konsekuensia di kalentamentu eksesivo di e aparatonan. Ta un echo ku e dos insidentenan aki a paralisá ekonomia di Kòrsou kasi total i ainda no a kuantifiká e pèrdida.

Cijntje

Loke a aselerá e desishon di Jonis pa entregá su ontslag, tabata e deklarashonnan di e minister di Desaroyo Ekonómiko, Ruisandro Cijntje, ku no a spar Aqualectra i su gerensia pa e loke ku a pasa.

Den un deklarashon resien e minister a laga sa ku e ta eksigí kuenta i splikashon di loke a sosodé ku suministro di koriente, i ku semehante insidentenan no ta akseptabel den e frekuensia ku nan ta tumando lugá. Cijntje a anunsiá ku ta bai buska un direktor tékniko banda di Jonis.