THE BOTTOM/KRALENDIJK- Dave Levenstone, lider di e partido ekstra-parlamentario UMP na Saba ke mira un konekshon aéreo direkto entre Boneiru i St. Eustatius, ku konekshon pa Saba. 

Levenstone, ku pa hopi aña a fungi komo hefe di asuntunan ekonómiko pa gobièrnu di Saba, ta hasi un apelashon riba gobièrnu di e tres islanan pone kabes huntu, i sinta na mesa ku EZ Air.

“Pa añanan larug nos ta papiando di un konekshon asina, ku ta mas ku lógiko. Konstantemente tin hopi turista hulandes na Boneiru, i ken ta bisa ku nan lo no tin gana di konosé St. Eustatius i Saba tambe?”, asina Levenstone ta puntra. 

Levenstone ta pensa tambe ku konekshon di St. Eustatius pa Saba, lo por wòrdu hasi pa e kompania SXM-Airways ku tin avión ku por baha na Saba tambe.

EZ Air

Levenstone ta mustra riba e echo ku EZ Air a wòrdu finansiá pa e fondo di penshun Karibe Hulandes (PCN), i ku pesei ta lógiko pa sinta ku e kompania aki pa wak bou di ki kondishon lo por yega na e konekshon aéreo deseá. 

“Ami ta di opinion ku nos mes gobièrnunan mester tuma e inisiativa a i no mester sigui warda riba Hulanda, ku a mustra nos hopi biaha ku nan no tin interes pa yuda den esaki. Pero si e ta di importansia pa ekonomia di nos islanan mes, nos mes no por tuma e inisiativa i hasi e kos aki un realidat” asina Levenstone a konkluí.