KRALENDIJK –  E proyekto ‘Across the Sea’ na Boneiru a risibí un sosten finansiero di un solo biaha di De Nederlandsche Bank (DNB). Ku e kontribushon aki, segun e banko, lo realisá un sitio konmemorativo riba e anterior plantashi Fontein, ku nan ta restorando aktualmente.

E sitio ta haña un monumento na memoria di Martis di Katalina Janga, e persona ehemplar pa sigui su ehèmpel ku a kuminsá na 1834 ku e rebelion di esnan ku a hasi katibu na Boneiru. Banda di dje ta lanta un edifisio pa enkuentronan i a plania proyektonan edukativo pa skolnan i e komunidat lokal.

Promé ku e sitio konmemorativo na Fontein ta kla pa bishitantenan, interesadonan por akudí kaba den un espasio di eksposishon spesial den Museo Terramar na Kralendijk. Aki ta duna mas idea di e pasado di sklabitut di Boneiru i e proyekto ‘Across the Sea’.

Kontentu 

Arjen de Wolff, presidente di direktiva di Across the Seas, ta reakshoná kontentu riba e notisia: “Nos ta sumamente kontentu ku e notisia ku DNB a disidí pa sostené e programa ‘Across the Seas’. A lanta e programa rondó di desaroyo kultural, konsiensia históriko i media. Mediante koperashon ku organisashonnan kultural, artistanan i inisiativa di siudadanonan esaki ta un proyekto pa   komunidat di Boneiru henter.”  

De Wolff ta enfatisá ku ta trahando duru huntu ku partnernan riba e isla i den region pa realisá proyektonan duradero, entre kua un sitio konmemorativo pa e rebelion bou di guia di Martis di Katalina Janga, un espasio spesial den Museo Terramar, i inisiativanan den Rincon i otro barionan. “Koperashon ta para dilanti, “na Boneiru mes, entre Boneiru i region, i ku Hulanda i Europa.”

E fundashon ta spera di duna un presentashon detayá pa prensa i públiko fin di novèmber, kaminda por hasi pregunta tambe.

Diskulpa 

Klaas Knot, Presidente di DNB, a pidi 1 di yuli 2022 na nòmber di DNB diskulpa pa nan ròl den e pasado di sklabitut trans-Atlántiko. Pa duna kontenido na e palabranan aki, DNB a reservá sinku mion euro pa kontribushonnan di un solo biaha na proyektonan pa edukashon i konservashon di patrimonio históriko.