KRALENDIJK- E debate polítiko ku a tuma lugá djasabra riba inisiativa di e programa di radio di Mega Hit FM Op de Klippen a tuma lugá den un ambiente ameno. 

E debate a tuma lugá na Club Trocadero, na unda e stashon di radio tin un studio tambe. Dutch Caribbean TV a transmití e debate. 

Ousente den e debate aki tabata atrobe Union Patriótiko Boneriano (UPB) ku no a manda ningun representante. Tur otro partido si tabata presente. 

Moderadó Arjen de Wolff a sòru pa e partidonan nobo òf mas chikitu a haña mesun tantu espasio ku nan koleganan mas grandi. Esaki a kondusí na un debate bon balansá, ounke mester bisa tambe unu ku a kana basta tranquil. 

Interesante tabata e echo ku e debate a bira mas interesante na momento ku e lidernan di partido a wòrdu remplasá pa otro kandidato riba e list. Pa MPB a bin sinta Debby Rauwers, pa DP Gianni van den Heuvel, pa M21 Anthony Weber, pa Un Union Frensel Janga i pa URB di Suzy Thodé Jay Frans. 

Konkreto

E kandidatonan, hopi biaha, tabata hopi mas konkreto riba kiko nan lo ke mira diferente na Boneiru, kompará ku e respektivo lider di partido. En partikular Anthony Weber di M21 a haña hopi aplouso i por bisa ku ta trata di un hoben hopi elokuente ku por ekspresá su mes bon. Den sentido positivo por bisa ku Jay Frans, na nòmber di URB tambe a sa di vosiferá hopi bon kiko ta su opinion riba diferente tema. 

Di otro banda mester bisa ku Gianni van den Heuvel, Debby Rauwers i Frensel Janga no a bin dilanti komo asina fuerte. Van den Heuvel hopi biaha tabata buska palabra i no tabata semper kla den su kontestanan. Debby Rauwers no a trese ningun punto ku tabata hopi original, i Frensel Janga den su totalidat no a agregá mashá na loke otronan a trese dilanti kaba. 

Si mester resumí hinter e debate mester bisa ku e partidonan nobo òf chikí a sorprendé di forma positivo, mientras ku esnan grandi manera MPB i PDB a desapuntá un tiki. Mester bisa si ku Clark Abraham i Aljano Emerenciana si, komo lider, a ekspresá nan mes basta bon i tambe na su punto. 

Ganadó

Si mester papia di un ‘ganadó’ den e debate, ABC Online Media lo skohe pa M21, pasombra den totalidat nan a sali na un manera fuerte, pa loke ta trata e kombinashon di Daisy Coffie ku Anthony Weber.