KRALENDIJK – Un delegashon di Miembronan di Konseho Insular a bishitá e region di Åland, un arkipélago ku gobernashon proprio bou di e Konstitushon di Finlandia i parti di su teritorio soberano.

E ehempel di Åland’ ta un di e strukturanan estatal mas studiá na mundu. Tur aña, delegashonan di vários país ta bishitá Åland pa orientá nan mes i studia e areglo konstitushonal di e region.

E delegashon di Konseho Insular tabatin vários kombersashon profundo na Åland, entre otro ku e Gobernador, Vise-premier, Presidente di parlamento, Miembronan di parlamento, Minister di medio ambiente i infrastruktura, Komisario di Polis, Gerensia di e emisora di radio i televishon públiko i representantenan di Åland Peace Institute; un NGO eksperto riba tereno di gobernashon propio ku ta fungi komo konsehero pa varios pais i region rònt mundu.

Deklarashon amplio

Riba termine kortiku, delegashon di Konseho Insular di Boneiru lo emiti deklarashonan mas amplio tokante e bishita di trabou na Åland.