KRALENDIJK – Delfins Beach Resort Bonaire a anunsiá un futuro kolaborashon ku e kadena di Hilton, kaminda Delfins lo bira un resort ku ta kai bou di  e asina yamá ’Tapestry Collection by Hilton’. E kolaborashon akí ta un paso importante pa oumentá e atrakshon di e resort popular i Boneiru komo destinashon pa biaheronan merikano.

Komo un resort independiente, Delfins a hunga un papel importante den turismo na Boneiru pa mas ku shete aña kaba. E paso pa afiliá na ‘Tapestry Collection’ by Hiltion segun Delfins ta kombiná e karakter úniko di Delfins, ku e siguridat i profeshonalismo di Hilton. 

“Di mes, tantu Delfins komo Boneiru tin un enfoke fuerte riba Oropa,” segun Chris Opgenoort, Gerente General di Delfins Beach Resort. “Ku e atenshon kresiente di e isla pa e gran potensial di e merkado merikano i e oumento di airlift, nos ta haña ku Hilton un partner ku ta posishoná nos fuertemente riba e merkado akí. Hilton tin kanalnan di distribushon fuerte i e programa di lealidat mas grandi na mundu, loke ta permití nos atraé mas huéspet merikano. E nòmber konosí Hilton ta duna nan e konfiansa pa biaha pa Boneiru.” Delfins ta sigui enfoká riba atraé huéspetnan ku ke deskubrí e isla den tur su fasetanan.

Benefisio

Miles Mercera, direktor di Tourism Corporation Bonaire (TCB), ta enfatisá e importansia di e kolaborashon pa e isla: “E afiliashon di Delfins na e “Tapestry Collection by Hilton” ta un paso importante pa Boneiru. Esaki ta pone e resort i pues nos isla mas haltu riba mapa di nos huéspetnan merikano, suramerikano i oropeo. Esaki ta un desaroyo positivo pa sektor turístiko di Boneiru. Tambe e ta kuadra ku nos ambishon pa ekspandé nos parti di merkado den Nort i Sur Amérika. 

‘Tapestry Collection by Hilton’

Tapestry Collection by Hiltion ta representá un kolekshon di hotèl i resort eksepshonal i independiente selektá pa Hilton pa nan karakter úniko i eksperensia di huéspet di kalidat haltu.