KRALENDIJK- Partido Demokrátiko Boneiru (PDB) djabièrne a manda otro karta pa e koleganan di Union Patriótiko Boneriano (UPB) pa proponé pa sinta ku otro na mesa djaluna awor pa papia tokante posibel koalishon. 

“Durante fihamentu di resultado di elekshon dia 23 di mart, Konseho Elektoral a stipulá resultado ofisial i repartishon di asiento pa Elekshon di Konseho Insular 2023. Nos ta asumí ku UPB tambe a sigui esaki i di e forma aki nos ta hasi un siguimentu riba disponibilidat di komishon di informashon UPB pa nos inisiá un proseso strukturá, pa por yega na un koalishon nobo ku por konta ku sosten amplio den Konseho Insular”, asina e komishon di negosashon a bisa den su karta pa UPB. 

Djaluna

E komishon a hasi un invitashon na UPB pa sinta djaluna awor pa diez ‘or di mainta. “Boneiru mester di un Gobièrnu nobo, stabil i ku ta kapas di enfrentá dilemanan i atende tópikonan fundamental riba nos isla di un forma desisivo. E Gobièrnu nobo ei ta nesesario mas pronto ku ta posibel” asina e karta firmá pa Arjen de Wolff di e komishon ta termina.