KRALENDIJK- E frakshon di Partido Demokrátiko Boneriano (PDB) no ta niun tiki kontentu ku e yamamentu lat pa reunionnan di Konseho Insular, i pa e echo pa hopi biaha ke organisá esakinan ku porta será. 

“Inkreibel”, asina líder di PDB, Clark Abraham a bisa djamars atardi. Segun Abraham gezaghèber Edison Rijna ta saka un invitashon pa un reunion banda di merdia, pa e reunion tuma mas lat anochi. “Pakiko yama reunion asina riba man”, Abraham ke sa. E líder polítiko ta mustra tambe riba e echo ku no ta por nada ku tin regla ku kuanto antisipashon normalmente mester yama un reunion di Konseho Insular.

Sekresia

Otro punto ku frakshon di Demokrat tin problema kune, ku awor a bira manera e tendensia di yama regunion tras di porta será (besloten). Ta kiko tantu tin di sekresia, ku niun di e tipo di reunion aki no por ta públiko, di moda ku poblashon tambe por skucha kiko ta papia. 

E situashon a pone ku frakshon di Demokrat a manda karta pa gezaghèber pa protestá e forma di proseder aki. A bolbe mustra e mandatario riba reglanan pa yama reunion di Konseho Insular. 

“Ounke nos tambe ta haña e reunionan aki i e tópikonan di kual lo papia importante, nos no enkurashá e tipo di mal ehèmpel aki. Ta pesei nos, komo frakshon, lo no ta presente na e reunion aki i otronan ku a keda yamá di e mesun forma”, asina Abraham a splike den su karta na Rijna.