KRALENDIJK- Partido Demokrátiko Boneriano (PDB) ta kontentu ku  Attje Kuiken, miembro di Tweede Kamer pa PvdA, a wòrdu elehí di frakshon di PvdA. 

Despues ku siman pasa sra. Lilian Ploumen a anunsiá di retirá komo lider di Frakshon i miembro di Parlamento, djabièrnè último frakshon di PvdA den Tweede Kamer mester a elehí un lider di frakshon nobo.

Attje Kuiken ta desde 2006 den Tweede Kamer pa PvdA i aktualmente ta bosero den Komishon di Asuntunan di Reino pa su Partido.

Kurason

Segun PDB, Kuiken ta konosí pa ta un parlamentario eksperensia, respetá, kritiko i ku su kurason na bon lugá. “E ta un luchadó ferviente den Tweede Kamer pa nos Islanan den Karibe, pero muy en partikular Bonaire, kual e ta bishitá frekuentemente tambe den su tempu liber”, asina PDB a skirbi.

Aliado

Demokrat a bisa tambe k unan ta rekonosé un aliado den Kuiken pa trese e doló nan di Bonaire riba agènda na Den Haag. “Na nòmber di Pueblo Boneriano, Partido Demokrat kièr felisitá Sra. Attje Kuiken ku e reto aki i ku e por konta ku sosten di Partido Demokrat den tur kos na interes di nos Pueblo i esnan marginá den komunidat!”, asina PDB a skibi den un relato di prensa djaluna.