WILLEMSTAD/KRALENDIJK- Departamentu tékniko di EZ Air e siman aki a kuminsá ku un kurso pa prepará pa traha riba avionnan SAAB 2000, ku pronto lo djòin e aerolinea. E kurso ta wòrdu duná dor di e kompania Saab na Suesia. 

Aktualmente, e promé avion ku lo bin abou ta na Suesia ainda, pero pronto lo bula bai Springfield na Merka, pa preparashonnan final pa wòrdu entregá na EZ Air. 

E avionnan Saab 2000 por karga 50 pasahero, ku ta mas grandi ku esnan ku ta usa aktualmente, ku por karga 34 pasahero. Despues di pandemia, EZ Air ta mira un demanda ku a krese hopi den un tempu rèkort. Ku e avionnan mas grandi, por transportá mas hende riba e buelonan. 

Mas spit

Tòg esei no ta e úniko motibu pa trese e Saab 2000 nan. “Aunke ta trata aki tambe di un avion de propeler, su motornan ta asina poderoso ku e ta bula ku spit di un djèt”, asina René Winkel, direktor general di e kompania ta splika. Dor di esaki, e avionnan por bula mas rápido, pero tambe mas haltu. Dor di bula mas haltu, e avion ta gasta ménos kombustibel.