WILLEMSTAD – Fundashon Pro Monumento, ProMo, ta atvertí gobièrnu pa vigilá e státus di Willemstad Patrimonio Mundial bon. Durante e Dia habrí di Monumento siman pasá, ku tabata bon bishitá, diferente oradó a ekspresá e mensahe ei.

E preukupashon pa e státus di Unesco ta bini di e konflikto di interes entre e invershonnan ekonómiko ku ta hopi nesesario i eventual afektashon di e balornan sosial i históriko di e patrimonio kultural den sentro di siudat.

Marusca Manuel, presidente di Fundashon Rif i Jacques Veeris, anterior minister di Enseñansa i Kultura, ku a hasi e promé paso pa duna Willemstad e kalifikashon siudat di patrimonio mundial di Unesco, a ventilá ámbos nan preukupashon pa Willemstad i si e por mantené su lugá komo patrimonio mundial mirando e konflikto di interes aki.

Senor Jacques Veeris a mustra riba Liverpool, ku finalmente a pèrdè su título di patrimonio mundial pa motibu di desaroyonan ku no tabata benefisioso pa e státus di patrimonio mundial.

Señor Jacques Veeris ta mustra den e kaso aki riba e hotèl Chines, ‘e blòk’i betòn’, banda di Marshe Bieu i e sentro di kompras banda di Cinelandia. Tambe Hotèl Majestic ku mester konstruí ainda den Pietermaai i e apartamentunan di The Warf, ku ta den proseso di konstrukshon i e Proyekto Plaza nobo ta duna motibu pa preukupashon.

“Kon Unesco lo balorá e proyektonan di konstrukshon grandi aki banda di e sentro di siudat históriko i agradabel?”, señor Veeris a puntra su mes.