WILLEMSTAD – Defensa di área Karibense ta habri portanan di base di Marina Parera atrobe despues di djes aña. Djasabra 10 di yüni bishitantenan ta bonbiní di 10’or di mainta te 4’or di atardi pa partisipá na rekorido riba barkunan, wak diferente demonstrashon òf partisipá na aktividatnan manera subi un toren òf sigui un rekorido ku medionan pa por mira anochi.

Por tira un bista tambe riba e material ku militarnan ta uza den region, manera arma, medionan pa por mira anochi i vehíkulonan. Su partnernan di seguridat manera Wardakosta di Área di Karibe, Kuerpo Polisial di Kòrsou i Citro tambe ta presente i ta konta entre otro di nan trabounan i e koperashon ku Defensa den e region aki. E demonstrashonnan di Defensa i Wardakosta di Área di Karibe ta tuma lugá riba tera, den awa i den laira di 10.30 te ku 1’or.

A krea un página di evento spesial riba Facebook ‘Dia habrí Base di Marina Parera Kòrsou’. Riba e página aki ta haña mas informashon di e dia mes.

Defensa ta aksentuá ku no por para outo na base di marina mes, pero ku lo tin transporte ku bùs grátis ku ta kore for di e tereno pa stashoná outo na Waaigat, e tereno di Amstel i e tereno di APC.