KRALENDIJK- Despues di un periodo di hopi bòmbòshi i tenshon polítiko, porfin Kolehio Ekehutivo a tuma un desishon negativo pa loke ta trata e pèrmit di konstrukshon pa Sunset Beach Resort. 

“Muchu haltu, muchu kamber, no ta kumpli ku stipulashonnan di e Strategic Tourism Master Plan pa un produkto turístiko di kalidat haltu, no ta pas tampoko ku otro edifisionan den bisindario i siguridat di tráfiko ta kore peliger”, segun un komunikado pa prensa ku gobièrnu di Boneiru a saka ayera. 

E plan ku a entregá pa konstrukshon di Sunset Beach hotel na Bulevar Gobernador Debrot, segun Kolegio Ehekutivo, ta kontra reglanan manera deskribí den Ruimtelijk Ontwikkelingsplan Bonaire (ROB). Pa e motibu ei, Entidat Públiko Boneiru ta rechasá e petishon pa entrega di un pèrmit di konstrukshon pa Sunset Beach Hotel. 

Tambe ta mustra riba e echo ku den ROB tin ku solamente por konstruí edifisio ku un dak di kua e subida di e dak ta minimalmente 15 i maksimalmente 60 grado. E edifisionan akí por tin un haltura máksimo di het di 12 meter i un haltura máksimo di konstrukshon di 15 meter. “E plannan ku e desaroyadó di Sunset Beach Hotel tin no ta kumpli ku e kondishonnan akí. Den e petishon pa pèrmit di konstrukshon ta pone ku e desaroyadó ta tuma komo punto di salida diferente edifisio ku 5 piso ku un dak plat na 15 meter di haltura”, segun gobièrnu ta bisa awor. 

Apartamentu

Entidat Públiko Boneiru a konstatá tambe ku tabata ofresé e apartamentunan den e hotèl komo bibienda permanente. Esaki miéntras, segun ROB, ta pèrmití solamente estadia kòrtiku na e sitio akí. Maneho di Entidat Públiko Boneiru ta pa yega na un produkto turístiko di kalidat haltu. Aki ta pas akomodashon di eskala chikitu, amplio ku un aparensia hopi luhoso. Pa e motibu ei, e plan di konstrukshon no ta pas den e área i ta bai a kosto di e bista di kaya i edifisio i kalidat di e área di rekreashon.

Den evaluashon di e plan di konstrukshon, Entidat Públiko Boneiru a tene kuenta ku siguridat di tráfiko. A skucha tambe otronan den bisindario. E personanan ei a ekspresá por eskrito nan preokupashonnan i den algun kaso a entregá un punto di bista referiendo na e petishon di e desaroyadó. Ku binimentu di e hotèl lo bira mas difísil pa yega na e terenonan ku ta keda pegá ku e hotèl. 

Eksonerashon

E desaroyadó a pidi Kolegio Ehekutivo pa haña eksonerashon pa e diferente puntonan menshoná. Den evaluashon di e petishon a tene kuenta ku loke ta den Lei Bibienda Popular, Ordenamentu di Teritorio i Maneho di Medio Ambiente (Wet volkshuisvesting, ruimtelijke ordening en milieubeheer BES / VROM BES), Wet grondslagen ruimtelijke ontwikkelingsplanning BES, i ROB. Ademas a tene kuenta ku e diferente reakshonnan di interesadonan. Teniendo kuenta ku tur echo i sirkunstansia, Entidat Públiko Boneiru a disidí pa no desviá di reglanan vigente i no duna eksonerashon. Pa e motibu ei a rechasá e petishon i a nenga e pèrmit di e konstrukshon ku a pidi.