KRALENDIJK- Instituto Hudisial Hulanda Karibense ta ofresé detenidonan durante nan detenshon posibilidat pa desaroyá nan mes.

 Ku un formashon un detenido tin mas chèns pa konstruí un eksistensia sosialmente aseptabel despues di regresá den sosiedat. Ademas, sigui un formashon ta sòru tambe pa un struktura durante detenshon. E proyekto aki yama ‘Ban Pa Kambio’. Ta duna e kursonan den kolaborashon ku Fundashon Forma. 

Si e detenidonan ta dominá e kondishonnan básiko lesa i skirbi bon, nan por bai sigui pa un kurso di MBO 1 i skohe entre tres perfil: Konstrukshon, Bèrdè i Horeka. Den e tres sektornan akí por haña hopi trabou na Boneiru. Asina e chèns ta mas grandi ku e studiante por haña un trabou despues di e periodo di detenshon i por kontribuí na un manera positivo na sosiedat boneriano.

Hasi algu bèk

E detenidonan ku durante nan detenshon ta sigui un kurso di MBO, den kuadro di e materia ‘Siudadania’, mester hasi algu bèk pa sosiedat. Den e konteksto akí tur aña ta skohe un instituto òf fundashon, pa kua e studiantenan ta bai traha artefaktonan. E aña akí ta Fundashon Kalor di Hogar, un kas di kuido pa ansiano. Siman pasá tabata asina leu i por a entregá e artefaktonan na e kas di kuido. Dos studiante di MBO Konstrukshon, durante e lèsnan, a traha riba dos teblachi pa remedi i 2 banki. Fundashon Kalor di Hogar a indiká ku nan tabatin nesesidat di esakinan. Banda di esei 2 studiante di MBO Horeka a pèrkurá pa 22 baki di fruta pa tur habitante i personal di Kalor di Hogar. 

Kompletá

JICN a kompletá e sèt ku 22 kasèt di remedi pa warda píldora. Un proyekto bunita i signifikativo di e detenidonan pa komunidat.