KRALENDIJK – Diálogo Sentral (CD) ta ekspresá su preukupashon pa e desaroyo ekonómiko no favorabel di Boneiru i ta hasi un yamada riba Reino, huntu ku Entidat Públiko Boneiru (OLB) i interesadonan lokal pa akshon konkreto.

Riba 15 di novèmber CD a hasi entrega na diputado Clark Abraham di e rapòrt ‘Verdienvermogen Bonaire: analyse van ontwikkelingen en verkenning van opties’ di Ofisina Ekonómiko Amsterdam (EBA).

For di e rapòrt ta sali na kla ku e prosperidat pa kada habitante ta baha, apesar di kresementu ekonómiko. Ta atribuí e kresemente aki  kompletamente na imigrashon, mientras e produktividat di trabou, outosufisiensia, i grado di okupashon turístiko ta baha. EBA ta sugerí pa oumentá outosufisiensia, desaroyá un asina yamá Blue Economy i medidanan dirigí pa manehá gastunan.

Koperashon

CD ta insistí riba koperashon entre Reino, OLB i ministerionan pa desaroyá un agènda di ehekushon i ta enfatisá e importansia di medidanan di maneho dirigí i un reda di siguridat sosial fuerte. Tambe CD ta hasi un yamada pa fortifiká inspekshon di trabou pa ataká iregularidatnan mihó.

Blue Economy

Un Blue Economy ta referí na un modèl ekonómiko ku ta dirigí riba uso duradero di oséano-, laman- i kostanan pa kresementu ekonómiko, mehorashon di kosto di bida i konservashon di salú di sistemanan eko marino. E konsepto ta kombiná desaroyo ekonómiko ku protekshon di medio ambiente, i ta pone énfasis riba kòntròl duradero di rekursonan marino.