WILLEMSTAD – Dierenbescherming Kòrsou a bisa ayera durante e huisio sumario ku e ta hañ’é obligá pa tuma akshon kontra un situashon kaminda ta laga kachónan di kaya kompletamente pa nan kuenta.

Segun Maria Luisa Garcia e situashon di kachónan riba kaya a bira un problema grandi. “Nos ta haña yamadanan di siudadanonan, organisashonnan, aeropuerto, hotèl. E problema a bira hopi grandi. Tur hende por mira esaki. Tin kachó ku ta morde hende, bestianan ku ta okashoná molèster i siudadanonan ku no ta sinti nan sigur mas riba kaya, gobièrnu ta rekonosé ku esaki ta un problema.”

Pa e motibu aki Dierenbescherming a tuma e inisiativa pa rekohé kachónan di kaya i kachónan chikitu. Si e doño no bin buska nan dentro di shete dia, lo sterilisá nan, duna nan un chep i pone nan den asilo.

“Pero tur hende ta komprondé ku nos no por tene un bestia pa tempu largu den asilo. Un momentu dado lo mester mata e bestia”, segun Garcia ta konta e matutino Èxtra. E ta bisa ku Kòrsou tin mas ku seis mil kachó di kaya ta kana rònt.

Diferente organisashon manera Feed Friends Foundation, Rescue Paws Curaçao Foundation, Stichting Dierenhulp Nederland i Tes Dog Foundation a entamá e huisio sumario ku tabatin djamars. Nan no ta di akuerdo ku e proyekto pa rekohé kachónan di kaya i kita nan for di kaya.

Segun Ofisina di Turistmo na Kòrsou, CTB, e problema di kachó ta un di e dos problemanan mas mentá ku turistanan ta eksperensiá. E resultadonan aki a kondusí na e echo ku CTB a sera un kombenio ku Dierenbescherming pa buska solushon pa e problemátika na Kòrsou.

E veredikto den e kaso aki ta riba 28 di febrüari próksimo.