KRALENDIJK – Polis na Boneiru ta detené vários automobilista pa motibu ku nan tabata kore bou di influensia di alkohòl.

Dia 23 di desèmber
Riba djabièrnè 23 di desèmber alrededor di 9.30 or di anochi un patruya di polis tabata manehá riba Kaminda Jato Bako den direkshon pa atendé ku un notifikashon ku a drenta sentral di polis, na momentu ku un outo a keda sin duna preferensia i a kausa un aksidente. E outo di polis a bin dal den e outo. Un kòntròl pa invesitigá e motibu di e violashon di regla di tráfiko a konstatá ku e shofùr tabata bou di influensia di alkohòl. A detené un hòmber di 53 aña di edat di insial R.J.G.C.

Dia 24 de desèmber

Riba djasabra 24 di desèmber alrededor di 4.30 di anochi un aksidente a tuma lugá entre un pikòp i un outo di famia na Hanchi Amboina. Shofùr di e pikòp a pèrdè kontrol di su vehíkulo i a bin dal den e outo di famia. Ambulans a transportá e tres personanan den e outo di famia pa hospital pa tratamentu médiko. A detené e shofùr di e pikòp, un hòmber di 39 aña di edat ku inisial A.E.T.T. pa manehá bou di influensia. 

Riba e mesun dia alrededor di 2.15 or di mardugá un patruya di polis a nota un persona ku tabata manehá di manera sospechoso riba un skuter riba Bulevar E.E.G. durante vigilansia general. Despues di un kòntròl, e shofùr a resultá ta bou di influensia di alkohòl. A detené un hòmber di 23 aña di edat di inisial D.A.K.J.  

Dia 25 di desèmber
Riba djadumingu 25 di desèmber alrededor di 11.30 di anochi un aksidente a tuma lugá riba Kaya Nikiboko Zuid. Shofùr di un outo a kore dal den un kura. E investigashon a indiká ku e shofùr tabata bou di influensia di alkohòl. A detené un hòmber di 60 aña di edat di inisial A.D.M.C.

Dia 27 di desèmber

Riba djamars 27 di desèmber alrededor di 08.42 di anochi un detenshon a tuma lugá riba Hanchi Amboina. Despues di un aksidente entre dos vehíkulo, polis a realisá un kòntròl for di kual a resultá ku e shofùr tabata bou di influensia di alkohòl. A detené un hòmber di 49 aña di edat ku inisial R.J.Z.V.