Despues ku diputado James Kroon, huntu ku direktor di R&O, Roy Martina a tene un konferensia di prensa den aprel di e aña aki, tur kos a bira ketu. Esei ta kuroiso, spesialmente si tuma na konsiderashon ku e mesun diputado a primintí ku desde e momentu ei, lo a bini ku ‘konferensia di prensa mensual’.

Algu ku, manera asina tantu otro kos, nunka no a materilisá. E echo ku e diputado ta hasi promesa sin kumpli, aparentemente no ta problema pa mayoria miembro di Konsheho Insular, den todo kaso esnan ku ta forma e koalishon di MPB ku UPB.

Tin biaha lo bo haña e impreshon ku komunikashon lo mester ta algu masha karu mes, i ku ta pesei ta asina pichiri pa kompartí informashon ku e pueblo, ku gobièrnu supuestamente ta ‘sirbi’.

Un bon ehèmpel ta e situashon ku e rotònde frakasá na Kaya Amsterdam. Último dianan por a nota ku tin trabou ta tumando lugá riba e kaminda aki, pero niun hende sa kiko ta e plan awor. Kaminda a sugerí ku lo bai konstruí un rotònde kompletamente nobo, segun un artíkulo den e matutino hulandes, Antilliaans Dagblad, ta preparando pa konstruí un krusada normal bèk entre Kaya Amsterdam i Kaminda Djabou. Kos ku niun hende no sa!

‘Supuestamente temporal’, pero e mesun Roy Martina lo a bisa e kortant ku e solushon temporal lo por keda asina pa vários aña.

Un otro ehèmpel kaminda gobièrnu nunka a tuma e molèster di komuniká ta e krusada di Kaya Grandi i Kaya Carlos Nicolaas, nèt dilanti kaminda tabata tin e edifisio di IMPO. Pa kasi un aña kaba, un parti di e kaminda aki a keda kla, mientras ku otro parti a keda un kaminda di tera ku dos blòki ku ta blokia e entrada.

Ta di komprondé ku e gobièrnu aktual no por wòrdu tené responsabel su só pa e situashon deplorabel di nos kareteranan. Esaki ta un produkto di hopi aña di neglisiensia i -primeramente- falta di sèn. Pero kiko ta pone ku e gobièrnu no por bin dilanti i splika, riba un base regular, kiko ta stroba e progreso den e plan di drechamentu di kaminda, kiko ta pasando na un sitio partikular, i/òf dikon un plan eksistente a kambia i kiko ta bin na su lugá.

Despues di e bishita di sekretario di Estado Raymond Knops i Minister Cora Van Nieuwenhuizen, den e simannan ku a pasa, mester konstatá ku ta di gobièrnu insular mes nos ta dependé pa drecha kaminda. Ojalá e gobièrnu aki por kuminsá kumpli por lo ménos ku su promesa di ta un tiki mas transparente i un tiki mas komunikativo. Te asina leu -aunke esaki no ta konta den mesun grado pa tur diputado den e kolegio ehekutivo- ta un berguensa total!