KRALENDIJK- Diputado Nina den Heyer lo no partisipá na elekshonnan benidero i ta planea di bandoná polítika aktivo. 

Aunke rumornan riba e posishon di Den Heyer tabata kore rònt pa basta tempu, e diputado popular a konfirmá esaki djabièrnè mainta na algún medio de prensa lokal. 

Ta ser bisá ku Den Heyer a keda despuntá ku e difikultat pa yega na resultadonan konkreto ku hulanda riba hopi punto. Tambe, asina ta ser bisá, ku Den Heyer riba hopi kos tabata tin un opinión diferente for di líder di partido MPB, Elvis Tjin Asjoe. 

Den Heyer, según por skucha di fuentenan bon na altura, Den Heyer no a sinti semper ku ela wòrdu respaldá pa Tjin Asjoe, den su trabou komo diputado. E situashon di konflikto den Kolegio Ehekutivo, ku entre otro gezaghèber Edison Rijna tampoko lo a aportá na e ambiente di trabou di Den Heyer, aunke su desishon di no bai otro elekshon mas, lo tabata di promé ku e konflikto a surgi. 

Perdida

Mester konsiderá e echo ku Den Heyer ke bandoná polítika komo un perdida pa e isla, pero sigur pa MBP. Den último elekshon Den Heyer no solamente a logra saka mas tantu voto personal di tur polítiko, pero ela saka dòbel e kantidat di su líder polítiko Elvis Tjin Asjoe. 

Segun por skucha, Den Heyer lo tabata ambishoná pa regresá su trabou anterior na RCN.