KRALENDIJK – Komo sekretario di Estado pa relashonnan den Reino Hulandes, Raymond Knops a hasi hopi esfuerso pa un mihó relashon entre Den Haag i e islanan di Karibe den Reino Hulandes, spesialmente e islanan BES, esaki segun e lider polítiko di UPB, diputado James  Kroon, relashoná ku e notisia resien ku a sali publiká ku Raymond Knops no ta bolbe bèk den e gabinete nobo. Na mes un momento mi ta mira dilanti ku anhelo pa un koperashon plasentero i fruktífero ku su  susesor, sra. Alexandra van Huffelen.

Sr. James  Kroon ta enfatisá e echo ku  Sr. Knops a dediká hopi tempu i energia na e koperashon. “ E a sali semper pa Bonaire na e momento oportuno, djis dilanti porta di elekshon di konseho insular, kual a kondusí na un di gobièrnunan di kolegio ehekutivo mas stabil for di 2010. Pa e motibu ei nos por a tuma paso nan dilanti konhuntamente. E echo ku tin biaha esakinan no a bai sufisiente rápido, no ta sinta serka e sekretario di estado, pero esaki ta debí na nos propio forsa di ehekushon limitá.”

“Knops tabata trese huntu kuné durante su bishitanan, mas minister i otro sekretarionan di estado, pa di e manera ei  nan por a mira ku nan propio wowonan kiko ta e  problemanan riba Boneiru. E gabinete finalmente a stipulá un punto di salida pa e mínimo sosial. No opstante esaki te ainda e ta keda bou di e nivel mínimo real. Mas aleu a subi e suèldu mínimo i  plaka pa yu i tambe e konstrukshon di e kasnan di hür  sosial a haña un empuhe. Nos tur por mira e adelanto relashoná ku konstrukshon di kayanan na Boneiru.
Mi sa sigur ku mi por gradisí Sr.Raymond Knops na nòmber di hopi Boneriano pa su esfuersonan i alabes dese’é tur kos bon pa futuro. Mi ta sigur tambe  ku sra. Van Huffelen por konta ku un kaluroso bon biní di parti di e pueblo Boneriano. Su partido D-66  a demostrá último añanan ku nan ta deseá lo mihó pa Hulanda Karibense, pues mi tin tur konfiansa ku den e añanan benidero nos lo traha bon ku e Señora aki i otro mandatarionan i hasi kosnan positivo huntu pa e desaroyo di Boneiru. Mi ta spera ku e Sekretario di Estado  lo bin sera konosí mas pronto ku ta posibel.”