KRALENDIJK- Diputado James Kroon resientemente tabata na Hulanda pa un bishita di trabou. Huntu ku su tim, nan a bishita i atendé diferente kos pa pronto ehekutá nan na Boneiru.  

”Mi a papia ku diferente ministernan na Hulanda i nos tabata tin vários reunion. Nos a papia entre otro ku minister Hugo de Jonge tokante trahamentu di kas. Pronto e minister mes lo bin Boneiru i e komberashonnan lo sikgui”, asina Kroon a splika.

Segun Kroon, den yüni ta bai kuminsá ku e proseso transporte públiko. Ta bai tin un proyekto piloto i sigui desaroyá riba dje. E idea no ta pa kita pan for di esnan ku ta kore bus. Ta bai regla e funshonamentu mas mihó i struktura.  

Drecha kaminda

Kroon a splika ku ya tin basta trabou ta tumando lugá pa loke ta drechamentu di kaminda. “Sin embargo, ta hopi kaminda pa drecha. A pidi fondo pa e parti seguridat, manera lus  pa iluminá e kamindanan. Kaminda di Rincon ta den mal estado i ta importante pa pone lus pa por tin bon bista riba e kaminda”, segun Kroon a bisa. 

20 mion

Tambe ta asina, segun e diputado di infrastruktura, ku posiblemente ta bini mas finansiamentu pa drecha infrastruktura. “Ta papia di 20 mion dòler èkstra ku ta disponibel pa Boneiru pa drecha e parti di kamindanan”, Kroon a sigui bisa. 

Un parti ku sigur tin atenshon di BC ta drechamentu di área rònt di hospital, pero tin hopi otro lugá ku tin mester di atenshon urgente.