KRALENDIJK- Diputado Hennyson Thielman di Ekonomia i Tourismo den kombersashon ku ABC Online Media djabièrnè a konfirmá di a tuma nota di e karta ku preokupashon di Bonaire Cruise Tourism Association, pero ku en realidat e no ta mira nada nobo. 

“Nos a anunsia mas ku un anja pasa ku nos lo bai tin un maneho nobo pa distrubuí e barku nan krusero mas mihó riba henter e aña dor di pone un limite di un barku grandi pa dia. Ya kaba tabata tin hopi booking hasí kaba pa e aña ei i pa e anja aki. Nos a honra esei tambe. Pero awoki nos ta jegando na un situashon ku barku nan di karga ku tin ku bin Boneiru direct a bira mas tantu dus nos mester jega mas lihé ahinda, vooral den sierto temporada druk na e 1 barku pa dia ei pa nos por akomodá barku nan di karga tambe pa preisnan na Boneiru por baha”, asina Thielman a splika. 

E diputado a sigui bisa ku a move sierto barku nan fecha kaba entre e islannan, pero tin algun dia ahinda ku no por. “Nos a bisa algun barku awoki ku posiblemente nos tin ku kansela pero nos ta purba un biaha mas pa schuif enbes di kansela”.

Kontesta

Thielman a bisa ku internamente ta preparando e karta di kontesta ku lo manda bèk pa BCTA, pero ku realmente e no ta haña ku por papia ainda di un ‘maneho nobo’ di parti di BC.