Notisia

Direktor di Hospital na Bonaire: “Ministerio di salubridat dispuesto pa ta gasta hopi sèn pa tin avion di ambulansia ku registrashon hulandes.”

Medicair pa hopi aña kaba ta operá e avion di ambulansia, mientras ku Fundashon Mariadal ta provee e enfermeranan. Pòtret: Medicair

KRALENDIJK – Segun direktor general di Fundashon Mariadal, Giovanni Frans, Ministerio di salubridat públiko na Hulanda (VWS) ta dispuesto pa paga tur gastu adishonal pa trese un avion di ambulansia ku registrashon hulandes PH pa Boneiru.

Esaki Frans a bisa siman pasá, de reakshon riba preguntanan di prensa tokante un posibel kambio den e kompania ku aktualmente ta operá e avion i e provee e pilotonan. Ta trata aki di e kompania Boneriano, Medicair N.V. Sin menshoná e nòmber di Medicair un solo biaha, Frans a indiká ku e servisio di medivac di Mariadal a resultá asina bon den e último añanan ku hospitalnan di otro islanan tambe ta hasiendo uso di e servisio aki.  

Sinembargo, segun Frans, e deseo di Ministerio Hulandes ta pa den futuro e transporte di pashent via aire tuma lugá pa medio di un avion registrá na Hulanda. Ministerio di VWS, segun Frans a sigui bisa, ta konsiderá esaki dje importante ei, ku nan ta dispuesto pa tuma tur gastu adishonal ku ta bini ku esaki pa nan kuenta.

Straño

Direktor di Medicair, René Winkel, a bisa den un kombersashon ku ABC Online Media ku ela keda straño skuchando ekspreshonnan di Frans. “Fundashon Mariadal ta un kliente eksistente di nos, i pesei realmente lo mi no ke bisa mashá tokante hinter e asuntu. Echo sí ta ku nos ta hasiendo e trabou aki pa mas di 20 aña kaba i – segun ami- na satisfakshon di Mariadal.” 

Winkel a menshoná ku intension di Mariadal mientrastantu no ta sorpresa mas pa nan. “Aña pasá, nos a keda aserká pa un asina yamá Request for Information (RFI), kaminda a indiká ku e futuro operadó mester tin su avionnan registrá na Hulanda. Nos no ta mira ku esaki ta práktiko òf asta faktibel. Pesei nos no a reakshoná riba e petishon di Mariadal. Nos ta komprondé tambe ku mientrastantu Mariadal ta buskando un otro proveedó pa tantu e avion komo e tripulashon.”

Pensamentu robes

Segun Winkel, e pensamentu ku un avion registrá na Hulanda lo ta mihó òf mas seif ku un ku  un avion ku tin registrashon PJ for di Outoridat di Aviashon Sivíl di Kòrsou (CCAA) no ta kuadra ètòl. “Dia ku e islanan di Antia a separá for di otro a firma un protokòl  ku otro i ku Hulanda pa rekonosé kompanianan di aviashon i lisensianan di otro. Pesei, e lokual Frans ta bisa no ta kuadra ku realidat. No tin motibu pa pensa ku supervishon for di Hulanda na un distansia di 8000 kilometer lo por ta mihó òf efektivo ku e supervishon ku Kòrsou Civil Aviation Authority (CCAA)”

Winkel a bisa tambe ku e ta lamentá e situashon pa e tim di Medicair. “Ta trata di profeshonalnan Boneiriano ku pa hopi aña kaba, ta para kla dia i nochi, den bon òf den mal wer, 365 dia pa aña pa transportá pashèntnan ku mester di kuido urgente pa eksterior.  Durante tur e añanan ei, nunka nos no a faya ku transporte di ningun pashènt. Pero ta parse ku tin forsanan den hospital ku tin otro pensamentu òf otro plan.”

Deel dit artikel
Rocargo
Rocargo
Rocargo
Rocargo