WILLEMSTAD – Tin diskòrdia den koalishon di MFK i PNP riba e aktitut di miembro di Parlamento Sheldry Osepa i Gwendell Mercelina den e debate riba refineria. E miembronan di PNP aki a sostené siman pasá un moshon di oposishon.

Den e moshon aki a pidi gobièrnu pa buska un operadó nobo pa e refineria i pone e susesor di PdVSA, Curaçao Petroleum Refinery, CPR, eventual un banda.

MFK ke pa PNP papia ku e dos miembronan di Parlamentu, di manera ku nan ta sostené e maneho di gobièrnu atrobe. E partido ta haña ku komo sosio den koalishon e no por haña sorpresa di sosionan den koalishon i opinionnan diferente. 

E resultado di e moshon tabata nuebe voto na fabor i nuebe voto kontra, pues no por ehekut’é.  

Segun e dos miembronan di PNP e sosten pa e moshon no ta un atake riba gobièrnu, sino un yamada na e mésun gobièrnu pa duna informashon kla i transparente na e pueblo.