ORANJESTAD – Djabièrn tin sentensia den e skandal di korupshon mas grandi ku Aruba a yega di konosé, e kaso penal Avestruz. E wes, ku a bini spesial for di Hulanda pa e kaso aki, ta dikta sentensia kontra djesun sospechoso, entre kua e sospechoso mayó anterior minister i aktual miembro di parlamento pa partido AVP, Benny Sevinger.

Segun Ministerio Públiko Sevinger tabata e konekshon esensial ku a hasi e korupshon na gran eskala aki posibel. Banda di Sevinger èks-kordinadó- i èks-direktornan di diferente departamentu di gobièrnu i empresarionan lo tende kiko nan sentensia lo ta. 

Sevinger

Ministerio Públiko a eksigí un kastigu di prizòn di sinku aña kontra Sevinger. E tabata minister di Infrastruktura, Integrashon i Urbanisashon. Den bista di Ministerio Públiko e èks-minister a hasi su mes kulpabel na soborno, froude ku fondonan públiko, maluzo di poder, labamentu di plaka i malversashon di fondonan.

Sevinger lo a traha trampa na diferente manera ku terenonan públiko i derechonan riba erfpagt optené ilegalmente durante gabinete di Mike Eman entre 2009 i 2017. 

Ademas Ministerio Públiko a eksigí pa kita Sevinger su derecho pasivo di elekshon, pues e no por pone su mes eligibel riba un lista, i su derecho pa okupá tur funshon pa e periodo máksimo. Si korte sigui e eksigensia di Ministerio Públiko, e periodo máksimo  lo ta pa un periodo di djes aña.

Lo start tambe un prosedura di ekspropiashon kontra Sevinger pa un montante di kasi un mion florin. Segun Ministerio Publiko Sevinger a hasi hopi daño na Aruba i esei ta tum’é hopi na malu.

Sussebeek

Ministerio Públiko ta eksigí kastigu tambe kontra e sospechoso Sussebeek, anterior ámtenar di Obranan Públiko. Un kastigu di prizòn di kuater aña pa soborno i labamentu di plaka.Tambe Ministerio Públiko ta eksigí konfiskashon di un montante di 1,3 mion dòler ku a konfiská na un banko na Kòrsou.

Segun Ministerio Públiko Sussenbeek ta esun ku tabatin e probecho ilegal mas  grandi manera a sali na kla klaramente den e investigashon Avestruz. El a probechá di su relashon ku e minister i a enrikesé su mes a kosto di komunidat Arubiano, segun Ministerio Públiko.

Otro sospechosonan 

Sospechoso Arends a tende un kastigu di tres aña kontra dje i un but maksimal di 25 mil florin. Ta sospech’é di estafá pais Aruba via diferente proyekto i di soborná e minister.

Ministerio Públiko a eksigí kastigunan di prizòn di dos aña i butnan maksimal di 25 mil florin kontra e sospechosonan Mansur, Werleman i Nuñez. Ta akusá nan tambe di estafa i falsifikashon.