WILLEMSTAD – Refineria Isla tin atenshon di djessinku kompania petrolero ku ta dispuesto pa habri’é bèk di nobo. Dentro di dos siman e doño di Refineria di Kòrsou (RdK) lo skohe e último dos kandidatonan, pa despues selektá e preferred bidder definitivo. Esaki Patrick Newton, e direktor di RdK, a informá Antilliaans Dagblad.

E direktor tin hopi konfiansa ku despues di tantu intento e refineria porfin lo bira operashonal. Su optimismo ta debí na kambionan geopolítiko i spesialmente e durashon kòrtiko di e kontrakt.

Gobièrnu a laga e promé eksigensia di un kontrakt di 30 aña kai. RdK ta negoshá aktualmente tambe ku kompanianan petrolero eksistente pa hasi e oferta mas atraktivo pa posibel eksplotadó den futuro.

“Ku simplifikashon di e kondishonnan nos ta hasi e oferta mas atraktivo. E ‘entrada’ ta bira mas kòrtiku i no tin mester di mara su mes mas na un kontrakt di 30 aña. Awor e norma ta sinku òf djes aña,” Newton ta splika. E ta pronostiká ku e refineria lo gana relevansia e siguiente binti pa trinta aña debí na e desaroyonan aktual den demanda di produktonan di zeta. Newton ta mustra riba e kambionan den Estados Unido, kaminda ta buska zeta krudo for di Venezuela, lokual ta mustra riba posibel suavisashon di sanshonnan.

Añanan largu 

E buskeda pa un sosio konfiabel a resultá di ta un proseso kompliká pa RdK, ku ta doño di e fasilidatnan petrolero riba e isla for di 2013. “E no ta fásil, pero mi ta kere siegamente den dje,” Newton ta enfatisá.

E inisio di e aktividatnan di refinashon ta sosodé den tres fase. Promé RdK ta kuminsá ku e aktividatnan di e kompania Merikano Global Oil, ku ta spesialisá den produkshon di asfalt pa merkado Merikano. E eskoho pa gas propano na lugá di asfalt na momento di prosesonan di kimamentu lo kontribuí tambe na eksigensianan di medio ambiente i lo ta operashonal mas promé.

Ta tene un prosedura di selekshon aktualmente pa e di dos i di tres fase di e refineria.

CPR

Ta rekòrdá ainda e resiente diskushonnan rondó di e último preferred bidder, Caribbean Petroleum Refinery (CPR). Ministerio Públiko (OM) ta investigando e falsifikashon di e dokumentonan bankario den e kaso aki.

Newton ta risibí e veredikto di wes, ku CPR mester paga RdK mas ku ocho mion dòler pa hür atrasá di tankinan di almasenahe na Bullenbaai, positivo.

Pero e ta enfatisá ku probablemente CPR lo no kumpli ku su obligashonnan. RdK tin opshonnan alternativo pa kobra e debe, entre kua e derecho di embargo riba entradanan di  benta di e zeta ku ta almasená.