WILLEMSTAD – Minister Dorothy Pietersz-Janga di Salubridat Públiko tin tres siman pa buta stapnan konkreto pa realisá un Sala di Emergensia. Si esei no ta e kaso, e dòkternan di kas lo tuma e promé paso i skrap wardanan di anochi, den mardugá i den wikènt. Esei ta pará den un karta ku Asosiashon di Dòkternan di kas, CHV, a manda pa e minister.

E eksigensia prinsipal pa realisá un Sala di Emergensia ta pa definí un tarifa pa wardanan di anochi, den mardugá i den wikènt. Te ku awor nunka dòkterrnan di kas no a haña un kompensashon èkstra pa esaki.

Kompania di seguro SVB ta para riba e punto di bista ku e kompensashon ta kobrá kaba den e preis di abono ku nan ta paga e dòkternan di kas pa kada pashènt ku ta sigurá.

E dòkternan di kas ta haña ku e minister ta tene nan na liña. Aña pasá ougùstùs tabatin un kòmbersashon entre e dòkternan di kas i e minister, kaminda a papia riba realisashon di un struktura di Sala di Emergensia pa asistensia primaria  anochi, den mardugá i den wikènt.

Segun e dòkternan di kas e minister no a hasi nada ku e kòmbersashon ei, tampoko despues di dos karta di rekordatorio. Ta e aña aki numa e minister ta reakshoná i ta bisa ku no ta posibel pa realisá un Sala di Emergensia den CMC, pero si ku e ta dispuesto pa buska huntu ku e asosiashon di dòkternan di kas un solushon esensial ku por implementá pronto pa asistensia primaria anochi, den madrugá i den wikènt.

Pa e grupo profeshonal aki nan kana a yena. Falta di sosten i un desishon di señora Pietersz-Janga pa reorganisá kuido den anochi, madrugá i den wikènt kontra un tarifa apart ta inaseptabel pa e dòkternan di kas.

Un karta pika ta un último intento pa konvensé e minister pa traha palabrashonnan dentro di un tempu rasonabel pa establesé un sala di emergensia pa servisionan di anochi, den madrugá i den wikènt kontra un tarifa separá.