WILLEMSTAD – Percy Pinedo ta bai ku su programa radio Hoyer 1. Por a skucha  ‘Doming’i Pleizi’ pa tres desenio na emisoranan Z86 i Mi95 di Curom, pero awor e programa i e presentadó ta muda for di 1 di yanüari pa e kanal kaminda el a kuminsá su karera na 1979.

Komo profeshonal independiente Percy Pinedo a presentá durante 34 aña diferente programa na kanalnan di Curom pa mundu di farándula, karnaval, deporte, digitalisashon òf elekshonnan.

Den e aña nobo e lo presentá tur djadumingu mainta entre 8’or i 12’or na e emisora E Solo di Pueblo, 101.9 FM. Einan e ta sigui ku su tradishon pa dediká tempu i espasio na músika nobo di nos propio artistanan, pero tambe na músika di antes, produkshonnan musikal nobo di eksterior, un espasio spesial pa músika di gòspel i debesenkuando un entrevista, kaminda su invitado ta interkambiá su preferensia musikal.

Percy Pinedo no ta bai sin su kompañé Eddy Sloop, mihó konosí bou di su nòmber di artista ‘Sleutel’ i asina e duo por sigui duna nan komentario riba tur aspekto di deporte, farándula i otro tópiko ku ta subi mesa. Na Radio Hoyer e programa lo sigui riba e mésun pia ku Doming’i Plezi durante tur e añanan ta konosí p’e.