WILLEMSTAD – Duana a kobra na luna di novèmber un montante rèkert di kasi djessinku mion florin na impuesto di benta na momentu di importashon. E rèkert anterior tabata na dezèmber 2021 ku algu mas ku djestres mion florin. Histórikamente mirá luna di dezèmber ta semper e luna ku e entrada mas haltu di impuesto di benta na momentu di importashon.

Apesar di e rèkert aki novèmber a produsí na tur ménos impuesto ku a presupuestá. Ta promé biaha ku esei ta sosodé e aña aki. Na tur a risibí 83 mion florin mientras a presupuestá 84 mion florin.

E motibu prinsipal di e entradanan abou pa saldo ta ku na luna di novèmber a paga kasi 16 mion florin bèk na impuesto.

Ounke e entradanan di impuesto den su totalidat pa luna di novèmber ta algu mas abou ku a presupuestá, e entradanan di impuesto di 2022 komo totalidat ainda ta mas ku 158 mion florin mas haltu ku a presupuestá i tambe konsiderablemente mas haltu ku e entrada di  añanan anterior.