KRALENDIJK – Den 10 aña di tempu a bini mas ku 4.200 trabou aserka. Kresementu di e poblashon i kresementu di turismo ta e faktornan mas importante di e kresementu di e kantidat di trabou entre 2011 i 2021, Centraal Bureau voor de Statistiek, CBS, ta bisa.

Ounke di e tres islanan den Hulanda Karibense Boneiru ta esun ku ta brinda mas oportunidat di trabou (84 porshento), e salarionan einan ta seis porshentu bou di e promedio di Hulanda Karibense. Na Sint Eustatius e salarionan ta 35 porshento mas haltu ku e promedio i na Saba e ta binti porshento.

Entre 2011 i 2021 e kantidat di empleo den kuido a oumentá. Kasi 1.000 empleo nobo den 10 aña di tempu. Tambe e kantidat di empleo den horeca a oumentá hopi, alrededor di 67  porshento.

Stagnashon

E kresementu promedio di trabou den Hulanda Karibense tabata 4,4 porshento den e ultimo djes añanan. E ultimo dos añanan e kresementu ta ménos ku e averahe: 1,1 porshento den 2020 i 2,8 porshento den 2021.

CBS ta kere ku esei ta debí na e pandemia di corona, pasobra ménos turista a bishitá Boneiru den e periodo ei. Hopi nogoshi riba e isla tabata dependé di turismo, manera den e ramo di transporte, informashon i komunikashon, horeca, i kultura i rekreashon.

Den e sektornan di hür i nogoshi di bienes inmóvil, salubridat i aktividatnan komersial e kantidat di empleo por sierto a oumentá mas ku promedio.

Sueldo anual bruto

E promedio di e sueldo anual bruto di empleadonan den Hulanda Karibense a krese entre 2011 i 2021 ku 22 porshento pa 27,3 mil dòler.

Empleadonana ku a haña e sueldu mas haltu den 2021 ta den e sektornan di servisio finansiero, energia, awa i maneho di sushi, i enseñasa.

Habitantenan ku un trabou den servisio komersial, horeca i agrikultura a haña un sueldu mas abou.