KRALENDIJK – E mihó artista marsial Boneriano Davidlee Winklaar a duna di konosé ku e ta preparando su mes pa e kampionato mundial na Abu Dhabi na 2025. E kickbokser simpátiko, ku ta traha na gobièrnu di Boneiru, ta un di e atletanan profeshonal mas disipliná ku Boneiru tin. Winklaar ta trein duru, pero ta ansioso tambe pa un evento di kickboxing ku e ke organisá huntu ku gobièrnu di Boneiru riba e isla.

“Mi ke mustra mi yu muhé ku bo por yega leu ku rèspèt i disiplina,” Winklaar ta konta nos ora nos a top’é durante siman. Na e momentonan aki e ta hasiendo un programa di yuna. Pa sigur 72 ora Winklaar no ta kome. Pakiko? E ke limpia su kurpa. Duna un tipo di reinisio. Asin’ei e ke pèrdè sélulanan di kurpa morto òf malu. No ta un tarea fásil. Pero e disiplina ku el a siña konstruí den su bida ta yud’é den esaki. “Tur hende por,” e ta laga sa. “Ta un kestion di ke. Esei ta konta pa hopi kos. Ta mi lema ku entre otro mi tin gana di traspasá pa mi yu muhé, pero tambe pa pueblo di Boneiru.”

Kickboxer eksitoso

David Winklaar ta un kickboxer ku a optené diferente preis internashonal na nòmber di Boneiru. El a gana entre otro un medaya di oro i di plata durante e kampionatonan Wako Pan-Amerikano K1. Tambe el a optené plata na e evento Wako Sùit-Amérika K1. E weganan Olímpiko di 2024 e mester a laga pasa. Den e trayekto di preparashon el a kibra su man. Asina ta ku no tabata realístiko pa partisipá na e torneo ei, kaminda pa promé biaha den historia kickboxing tabata riba e programa.

Winklaar su biahe pa yega tòp ta unu di sakrifisio i dedikashon inmenso. “Pa mas ku djestres aña nunka mi tabatin fakansi òf selebrá mi hasimentu di aña. Tur loke nos tabatin na kas, a bai pa mi karera,” e ta kòrda. E dedikashon firme aki no a dun’é solamente un medaya di plata durante kampionatonan Pan-Amerikano na 2023, sino tambe el a hasi su famia orguyoso. Su tata por ehèmpel tabata un coach di atletismo. El a soña semper di un kampionato pa su yu hòmber.

“E forsa di un hende. Si bo ke algu i bo ta bai p’e, e ta bai di bo kurason pa bo memoria. I di bo memoria bo ta bai vosifer’é i despues bo ta bai hasi’é gewon. Mi ta kere den e teoria aki. El a dunami mas biaha resultado,” Winklaar ta bisa, reflektando riba e forsa mental ku a yud’é surpas’a opstakulonan.

E dia ta kuminsá 4’or di madrugá 

Ta parse ku Winklaar, ku mientrastantu tin 31 aña, poko poko ta bai terminá su karera. “E aña aki mi a duda un ratu si mi kier a stòp kaba,” segun e kickboxer. Pero ku e kampeonato mundial di Abu Dhabi 2025 na bista, e ke konsentrá un biaha mas riba su treinennan. “Mi dia ta kuminsá tur ora 4’or di madrugá. Mi ta bai kore, yega kas, drecha mi yu muhé pa bai skol, traha henter dia i e ora ei anochi mi ta duna lès di kickboxing i mi mes ta trein,” e ta splika. Dos biaha pa dia Winklaar ta trein. E meta ta pa bira kampeon mundial na 2025.

Traspasá propio eksperensianan pa e pueblo 

Pero no ta su propio karera deportivo so ta pará sentral. Winklaar tin tambe un vishon kla definí pa futuro di Boneiru. “Mi ke yuda mi pueblo. Tin hopi hende awor aki ku asina tantu malesa i e ora ei nan ta puntra: ‘Si, pero mi ta asina hóben. Kon por ta ku mi tin esaki, ku mi tin esaya?’ Mi ta kere ku mi por yuda hende ku duna konseho. Pasobra ta bai pa bo estilo di bida, kon bo ta biba henter dia. Mi ta spera ku mi por inspirá hendenan na Boneiru den futuro ku mi eksperensianan.”

Weganan Olímpiko na 2028

E despedida di Winklaar ta planiá pa 2025. Un torneo mas e ke duna tur loke e tin den dje. Despues ta kla. Òf aloménos, si resultá ku ta organisá kickboxing durante Weganan Olímpiko na Los Angeles na 2028, e ora ei e ta sigui. Esei no ta sigur ainda. Pasobra e deporte no ta un di e sekshonnan fast di e Weganan aki. Si resultá ku esaki no ta e kaso, e ora ei ta parse ku 2025 lo ta e stashon final di e atleta profeshonal.

“Tin un torneo planiá si pa otro aña despues di karnaval,” e ta divulgá. “Den konsulta ku gobièrnu mi ke organisá un pelea grandi aki na Boneiru. Nos ta spera ku alrededor di 4.000 pa 5.000 hende ta bini. Ta p’esei nos ke buska un bon kontrinkante p’ami. Riba nos invitashon e ta bini Boneiru. Kuné mi ke bai e pelea. Durante e evento mi ke demostrá Boneiru un biaha mas loke bo por logra ku trahamentu duru i disipliná.”