WILLEMSTAD – E próksimo dos simannan ta bai drecha Saturnusstraat i e lo ta será pa tráfiko. Ta trata di e asina yamá krusadanan hisá den e kaya ku a sak.

Saturnusstraat ta un di e dos rutanan di tráfiko importante ku ta konektá Saliña i su variantenan ku Caracasbaaiweg banda di misa di Janwé

E krusadanan hisá, ku ta fungi alabes komo ‘sleeping policeman’, no tin hopi tempu poné, pero no a konstruí nan bon, ku konsekuensia ku nan a sak pa motibu di e tráfiko frekuente.

Ta saka e klenkunan ku a usa awor i MNO Vervat ta bai basha betòn, ya asina e krusadanan ta wanta mas.

Ta guia outomobilistanan ku bòrchinan ku ta indiká rutanan alternativa, pero mester tene kuenta ku formashon di fila i molèster. Habitantenan por bai nan kas normal, méskos ku personal di nogoshinan den e kaya.

Parera

E tráfiko riba Schottegatweg mester tene kuenta ku molèster na e krusada na e salida pa bai Selikor i Asilo di Bestia.

Ei ta kambiando e lusnan di tráfiko pa iluminashon LED. E trabounan ei ta kuminsá mañan i ta dura te ku djabièrnè.